PYRMAIS LASEJUMS Am 9, 11–15
Pravītōjums par Izraeļa atsagrīzšonu nu gyusta.
LASEJUMS NU PRAVĪŠA AMOSA GRŌMOTAS
Tū soka Kungs:
«Tamā dīnā es uzslīšu Davida teļti, kas
beja sakrytuse, un aizmyurēšu tōs plaisas, un tū, kas beja sagryvis, es atjaunōšu
un tū uzceļšu nu jauna kai senajōs dīnōs, lai jī īgyutu sev īpašumā pōri palykušūs
nu Edoma un vysas tautas, pōr kurom tyka pīsaukts muns vōrds,» soka Kungs, kurs
tū izdareis. «Redzi, nōk dīnas,» soka Kungs, «ka pļōvējs īs tyuleņ aiz orōja un
veinūgu spīdējs tyuleņ aiz gryudu sējēja, un kolni lāsōs ar veinu, un applyuss
vysi pakolni. Un es atbreivōšu nu gyusta munu Izraeļu tautu; jī atjaunōs nūpūsteitōs
piļsātas un tymōs sōks dzeivōt, jī īstōdeis veinadōrzus un dzers nu tim veinu,
un īreikōs dōrzus, un ēss tū augļus. Un jūs es īdēsteišu jū zemē, un jī vairs
natiks izrauti nu sovas zemes, kū es jim devu,» soka Kungs, tovs Dīvs.
Tys ir Dīva vōrds.
PSALME 85 (84)
Refrens: Dīvs
sludynoj mīru sovai tautai. (R. 9b)
9 Es
klauseišūs, kū soka Kungs Dīvs,
jo jys sludynoj mīru sovai tautai un
sovim svātajim,
un tim, kas nu sirds pi jō atsagrīž.
Refrens
11 Žāļsirdeiba
un patīseiba izīs vīna ūtrai pretim,
taisneiba snēgs skupstu mīram.
12 Patīseiba
izaugs nu zemes,
un taisneiba raudzeisīs nu dabasim.
Refrens
13 Jo
Kungs dūs svēteibu,
un myusu zeme dūs sovu augli.
14 Taisneiba
staigōs jō prīškā,
un pesteišona sekōs jam pādōs.
Refrens
PYRMSEVANGELIJA DZĪDŌJUMS Jņ 10, 27
Alleluja.
Munas vuškas klausa munu bolsu,
es jōs pazeistu, un jōs maņ sekoj.
Alleluja.
EVANGELIJS Mt 9, 14–17
Vacōs Dereibas īrašas nav pījamamas Jaunajā Dereibā.
LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS
MATEJS
Tymā laikā:
Jōņa Kristeitōja mōcekli pīgōja pi Jezus
un vaicōja: «Kōpēc mes un farizeji bīži gavejam, bet tovi mōcekli nagavej?» Un
Jezus jim saceja: «Vai kōzu vīsi var byut nūskumuši, cikom leigovaiņs ir pi
jim? Bet nōks dīnas, kod nu jim leigovaiņs tiks pajimts; un tod jī gavēs. Nivīns
našyun jaunas drānas īlōpu uz vacom drēbem, tōdēļ ka īlōps atpleist nu drēbem,
un caurums kļyust lelōks. Ari jaunu veinu nalej vacūs traukūs, cytaidi trauki pōrpleist,
un veins izleist, un trauki aizīt būjā. Bet jaunu veinu lej jaunūs traukūs, un
tod obi uzagloboj.»
Tys ir Kunga vōrds.