PYRMAIS LASEJUMS Am 5, 14–15. 21–24
Dīvs vēlejās patīsu gūdynōšonu.
LASEJUMS NU PRAVĪŠA AMOSA GRŌMOTAS
Meklejit lobu, navys ļaunu, lai jyus
dzeivōtu un lai Kungs, debesspulku Dīvs, byutu ar jums, kai jyus asat tū teikuši!
Īneistit ļaunu un mīļojit lobu, un sprīdit vōrtūs taisneigu tīsu! Varbyut tod
Kungs, debesspulku Dīvs, apsažālōs par atlykušajim nu Jezupa ciļts. «Es naīradzu,
nacīšu jyusu svātkus, maņ napateik jyusu sanōksmes. Un, jo jyus nessit maņ
dadzynojamūs upurus un sovas dōvonas, es tōs napījimšu, un pateiceibas upurus nu
jyusu traknajim dzeivinīkim es nagrybu redzēt. Aizvōc prūjom nu manis sovu dzīsmu
trūksni, un tovu liru skaņas es nasavēleju klauseitīs. Tod taisneigi sprīdumi
plyuss kai yudiņs un taisneiba kai myužeigais strauts.»
Tys ir Dīva vōrds.
PSALME 50 (49)
Refrens: Dīva
pesteišonu redzēs taisneigī. (R. sal. 23)
7 Klausīs,
muna tauta, un es runōšu;
Izraeļ, un es līcynōšu pret tevi:
Dīvs, tovs Dīvs, es asu.
Refrens
8 Es
navainōšu tevi par tovim upurim,
jo tovi dadzynojamī upuri vysod ir munā
prīškā.
9 Es
najimšu teļus nu tova noma,
ni ari ōžus nu tova gonompulka.
Refrens
10 Jo
vysi meža zvēri ir muni,
dzeivinīki tyukstūšas kolnūs.
11 Es
pazeistu vysus dabasu putnus,
un maņ pīdar tys, kas kustās uz lauka.
Refrens
12 Jo es
izsaļcis byušu, nu tevis es nasōkšu praseit,
jo muna ir pasaule un vyss, kas tū pīpylda.
13 Vai
tod es ēžu vērša gaļu,
vai tod es dzēru ōžu asni?
16 Kōpēc
tu daudzynoj munas bausleibas
un ar sovu muti pīmini munu dereibu?
17 Pamōceibas
tu īneidi
un munus vōrdus aizmeti prūjom aiz
sevis.
Refrens
PYRMSEVANGELIJA DZĪDŌJUMS Sal. Am 5,14
Alleluja.
Meklejit lobu, navys ļaunu,
lai jyus dzeivōtu, un Kungs Dīvs byutu
ar jyusim.
Alleluja.
EVANGELIJS Mt 8, 28–34
Ļaunū goru izdzeišona.
LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS
MATEJS
Tymā laikā:
Kod Jezus nūnōce Gadarenīšu zemē, jam
pretim izskrēja nu kopim izgōjuši divi ļaunō gora apsāstī. Jī beja ļūti mežūneigi,
tai ka nivīns navarēja staigōt pa šū ceļu. Un, lyuk, jī klīdze, saceidami: «Kas
mums ar tevi, Dīva Dāls? Vai tu atnōci uz šejīni myusus pyrms laika mūceit?» Tōlumā
nu jim ganejōs lels cyuku bors. Un ļaunī gori lyudze jū, saceidami: «Jo tu
myusus izdzeņ, tod syuti myusus cyuku borā.» Un, lyuk, vyss gonompulks strauji metēs
pōr krauju jyurā un yudinī nūsleika. Bet goni aizbāga un, nūnōkuši piļsātā, par
vysu pastōsteja un ari par tim, kas beja ļaunō gora apsāsti. Un, lyuk, vysa piļsāta
izgōja Jezum pretim un, jū īraudzejuši, lyudze, lai jys aizītu nu jūs rūbežom.
Tys ir Kunga vōrds.