Menu:














 

ūtardĪna, 31. Juļs

PYRMAIS LASEJUMS Jer 14, 17–22

Pūsta laikā cereiba uz Dīvu.

LASEJUMS NU PRAVĪŠA JEREMIJA GRŌMOTAS

Dīnu un nakti munas acis lej osoras un nanūrymst, jo ar lelu sakōvi ir sakauta Jaunova, munas tautas Meita, ar pōrlīku smogu sitīni. Jo es izeju uz lauka, lyuk, krytušī nu zūbyna, un, jo īeju piļsātā, lyuk, myrušī bodā. Pat pravīts un prīsters kleist apkōrt pa zemi, nikō nasaprozdams: Vai tod pavysam esi atmetis Judu un vai tod Sions ir apsarībis tovai dvēselei? Kōpēc tod tu esi myusus sitis, tai ka nav dzīdynōšonas? Mes gaidejom mīru, bet nav nikō loba, un izdzīdynōšonas laiku, bet, redzi, ir tikai izbailes. Kungs, mes atzeistam sovu bezdīveibu, sovu tāvu nūzīgumus, jo mes grākōjom pret tevi. Sova vōrda dēļ naatstōj myusus kaunā, nadori nagūdu sovas gūdeibas trūņam. Atcerīs, nalauz sovu dereibu ar mums. Vai tod storp pogōnu alkim ir taidi, kas syuteitu leitu? Un vai dabasi spēj dūt leita lases? Vai tod na tu esi Kungs, myusu Dīvs, kū mes gaidom? Tū vysu taču radeji tu.

Tys ir Dīva vōrds.

 

PSALME 79 (78)

Refrens: Kungs, atpestej myusus sova vōrda gūdam. (R. sal. 9b)

8 Napīmini myusu tāvu vaines;

tova žēlesteiba lai ōtri nōk pōr mums,

jo asam klivuši pōrlīku vōji.

9 Paleidzi mums, myusu pesteišonas Dīvs,

tova vōrda slaves dēļ un myusus atbreivoj,

un tova vōrda dēļ pīdūd myusu grākus.

Refrens

10 Tovā prīškā lai nūnōk gyustekņu vaimanas;

ar sovas rūkas spāku izglōb nūlamtūs nōvei.

13 Bet mes, tova tauta un tovu ganeibu vuškas,

uz myužim gūdōsim tevi,

nu paaudzes paaudzē teiksim tovu slavi.

Refrens

 

PYRMSEVANGELIJA DZĪDŌJUMS

Alleluja.

Sākla ir Dīva vōrds, bet sējējs ir Kristus;

kas jū atrūn, tys dzeivōs uz myužim.

Alleluja.

 

EVANGELIJS Mt 13, 36–43

Jezus izskaidroj leidzeibu par nazōlem.

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS MATEJS

Tymā laikā:

Jezus, atlaidis ļaudis, īgōja nomā, un jō mōcekli, pīgōjuši pi jō, saceja: «Izskaidroj mums leidzeibu par nazōli teirumā.» Jys atbyldūt saceja: «Tys, kas sēj lobū sāklu, ir Cylvāka Dāls, bet teirums ir pasaule. Lobō sākla ir vaļsteibas bārni, bet nazōle ir Ļaunō bārni. Īnaidnīks, kas īsēja nazōli, ir satans. Pļōve ir pasaules gols, bet pļōvēji ir eņgeli. Kai nazōli savōc un sadadzynoj gunī, tai tys nūtiks ari pasaules beigōs. Cylvāka Dāls izsyuteis sovus eņgeļus, un tī salaseis nu jō vaļsteibas vysus īļaunōjumus un tūs, kas dora nataisneibu, un īmess tūs guņs krōsnī. Tur byus raudōšona un zūbu grīzšona. Tod taisneigī speidēs kai saule sova Tāva vaļsteibā. Kam ir ausis, tys lai klausōs.»

Tys ir Kunga vōrds.



























Copyright © 2013-2018 Romas katoļu Baznīcas Rēzeknes-Aglonas diecēze