PYRMAIS LASEJUMS Jer 7, 1–11
Aicynōjums atsagrīzt.
LASEJUMS NU PRAVĪŠA JEREMIJA GRŌMOTAS
Vōrds, kuru Kungs atklōja Jeremijam,
saceidams:
«Nūsastōj Kunga noma vōrtūs un sludynoj
tur šūs vōrdus, un soki: klausitēs Kunga vōrdu, jyus vysi nu Judas, kas īejat
pa šim vōrtim, lai pīlyugtu Kungu.» Tū soka debesspulku Kungs, Izraeļa Dīvs:
«Izlobojit sovus ceļus un sovus dorbus, un es jums ļaušu dzeivōt šamā vītā.
Nauzaticit malu vōrdim, kas soka: «Kunga svētneica, Kunga svētneica, tei ir
Kunga svētneica!» Jo tod, kod jyus nūpītni izlobōsit sovus ceļus un sovus dorbus,
jo sprīssit taisneibu storp cylvāku un jō sōnceņsi, naapbādynōsit svešinīku, bōrini
un atraitni, jo šamā vītā naizlīsit navaineigu asni un nasekōsit svešim dīvim
jums pošim par ļaunu, tod es jums ļaušu dzeivōt šamā vītā, zemē, kū asu devis
jyusu tāvim uz myužeigim laikim. Lyuk, jyus veļteigi pasaļaunit uz vyltus vōrdim,
kas nanas lobu. Kōpēc? Jyus zūgat, nūkaunat, lauleibu pōrkōpat, nasat
kyupynojamūs upurus Baalam un sekojat svešim dīvim, kurus napazeistat. Un pēc
tam jyus nōkat un stōjatīs munā prīškā šymā nomā, pōr kuru ir pīsaukts muns vōrds,
un sokot: «Mes asam glōbti,» lai dareitu ari turpmōk vysas šōs naganteibas. Vai
tod par slapkovu bedri jyusu acīs ir klivis šys noms, pōr kuru ir pīsaukts muns
vōrds? Un es, lyuk, tū radzu,» soka Kungs.
Tys ir Dīva vōrds.
PSALME 84 (83)
Refrens: Cik
meila ir Dīva svētneica. (R. sal. 2a)
3 Muna
dvēsele tveikst un ilgojās
pēc Kunga pogolmim.
Muna sirds un muna mīsa
līksmi sauc uz dzeivū Dīvu.
Refrens
4 Pat
zvērbuļs atrūn sev mōjūkli
un bezdeleiga – ligzdu, kur tei sovus
mozuļus gulda:
pi tovim oltōrim, debesspulku Kungs,
muns Dīvs un muns karali!
Refrens
5 Svēteigi
ir tī, kas dzeivoj tovā nomā:
jī myužam tevi slaveis.
6 Svēteigs
ir veirs, kuram paleidzeiba nōk nu tevis
un kam prōtā ir svātcelinīku gaitas.
Refrens
8 Jī īs
nu spāka uz spāku,
Dīvu pōr dīvim īraudzeis Sionā.
11 Jo vīna
dīna tovūs pogolmūs
ir lobōka nakai tyukstūšas cytu.
Es lobōk vēlejūs byut tovā nomā pi slīkšņa
nakai dzeivōt grēcinīku teļtīs.
Refrens
PYRMSEVANGELIJA DZĪDŌJUMS Jk 1, 21
Alleluja.
Lānprōteibā pījemit jyusūs īsātū vōrdu,
kas var izglōbt jyusu dvēseles.
Alleluja.
EVANGELIJS Mt 13, 24–30
Leidzeiba par nazōlem labeibas laukā.
LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS
MATEJS
Tymā laikā:
Jezus pastōsteja ļaudim cytu leidzeibu,
saceidams: «Dabasu vaļsteiba pīleidzynojama cylvākam, kas sovā teirumā īsēja
lobu sāklu. Bet, cikom ļaudis gulēja, atnōce jō īnaidnīks un storp kvīšim īsēja
nazōli, un aizgōja. Bet, kod labeiba izauga un deve vōrpas, tod pasarōdeja ari
nazōles. Un noma tāva kolpi pīgōja un saceja jam: «Kungs, vai tu naīsēji lobu sāklu
sovā teirumā? Nu kurīnes tod tymā rodōs nazōles?» Un jys tim atbiļdēja: «Naideigs
cylvāks tū izdareja.» Bet kolpi saceja jam: «Vai gribi, ka mes ejam un tōs
salosom?» Bet jys saceja: «Nā, lai jyus, ravejūt nazōli, kūpā ar tū naizrautu
ari kvīšus. Ļaunit obim augt leidz pļōves laikam. Un pļōves laikā es saceišu pļōvējim:
«Savōcit vyspyrms nazōli un sasīnit tū kyuleišūs sadadzynōšonai, bet kvīšus
sakrōjit munā škyunī».»
Tys ir Kunga vōrds.