PYRMAIS LASEJUMS Jer 23, 1–6
Dīvs pats īceļs gonus.
LASEJUMS NU PRAVĪŠA JEREMIJA GRŌMOTAS
«Bāda tim gonim, kas aizvad būjā un
izkleidynoj munu ganeibu vuškas,» soka Kungs. Tōdēļ Kungs, Izraeļa Dīvs, tū
soka gonim, kas gona jō tautu: «Jyus izkleidynōjot munu gonompulku un tū izdzonōjot,
un par tū nasaryupējotēs; tod, lyuk, es pasaryupēšu strōpēt jyusu dorbu ļaunumu,
soka Kungs. Un es sapulcynōšu sova gonampulka atlykušōs vuškas nu vysom zemem,
uz kurom tōs beju aizdzinis, un atvesšu tōs uz tūs ganeibom, un tōs augs un
vairōsīs. Un es īceļšu pōr tom gonus, un jī tōs ganeis. Tōs vairs nasabeis un
nauzatrauks un nivīnu vairs navajadzēs meklēt, soka Kungs. Redzi, nōks dīnas,
soka Kungs, kod es uzmūdynōšu Davidam taisneibas Atvasi. Jys vaļdeis kai kēneņš
un byus gudrs, un gōdōs par lykumu un taisneibu zemes vērsā. Jō dīnōs tiks
atpesteits Juda, un Izraeļs dzeivōs drūšeibā. Un šys ir vōrds, kurā jū nūsauks:
«Kungs ir myusu taisneiba.»»
Tys ir Dīva vōrds.
PSALME 23 (22)
Refrens: Kungs
mani voda, maņ nikō natryuks. (R. 1)
1 Kungs
mani voda, maņ nikō natryuks;
2 zōlainōs
ganeibōs jys dūd maņ vītu,
jys aizvad mani pi yudiņa, kas veļdzej,
3 munai
dvēselei jys atjaunoj spākus.
Refrens
4 Pat,
jo es staigōšu tymsā nōves īlejā,
es nasabeišu ļaunuma, jo tu esi pi
manis.
Tova vāza un gona reikste
līk maņ pasaļaut uz tevi.
Refrens
5 Tu
esi klōjis maņ goldu,
munim īnaidnīkim radzūt;
tu svaidi munu golvu ar eļļu,
muns kauss ir piļdeits leidz molom.
Refrens
6 Tova
laipneiba un žēlesteiba mani pavadeis
nu dīnas dīnā.
Un es palikšu Kunga nomā
vysōs sova myuža dīnōs.
Refrens
ŪTRAIS LASEJUMS Ef 2, 13–18
Kristus vīnoj cylvākus.
LASEJUMS NU SVĀTŌ APOSTOLA PŌVULA VĒSTULES EFEZĪŠIM
Brōli:
Tagad Kristū Jezū, jyus, kas cytkōrt
bejot tōli, asat klivuši tyvi, pasateicūt Kristus ašņam. Jo jys ir myusu mīrs. Jys
obas ciļvēces daļas savīnōja vīnā un nūjauce škirūšū myura sīnu – īnaidu. Sovā
mīsā jys atcēle bausleibu Lykumu, kas izapaude prīkšrokstūs, lai divus cylvāku
veidus sevī pōrveidōtu vīnā jaunā cylvākā, nūdybynojūt mīru, un lai vīnus un ūtrus
vīnā mīsā samīrynōtu ar Dīvu caur krystu, nūnōvādams sevī īnaidu. Un atnōcis
jys pasludynōja mīru jums, kas bejot tōli, un mīru tim, kas ir tyvu, jo caur jū
mums: kai vīnim, tai ūtrim vīnā Gorā ir pīeja pi Tāva.
Tys ir Dīva vōrds.
PYRMSEVANGELIJA DZĪDŌJUMS Jņ 10, 27
Alleluja.
Munas vuškas klausa munu bolsu,
es jōs pazeistu, un jōs maņ sekoj.
Alleluja.
EVANGELIJS Mk 6, 30–34
Jezus ir lobais Gons.
LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS MARKS
Tymā laikā:
Apostoli sasapuļcēja pi Jezus un jam
pastōsteja vysu, kū beja darejuši un mōcejuši. Un jys tim saceja: «Jyus poši aizeite
savrup vīntuļā vītā un nadaudz atsapyutit.» Jo daudz beja tū, kas nōce un gōja,
tai ka jim nabeja laika pat paēst. Tod jī ar laivu aizbrauce savrup uz nūmaļu vītu.
Bet tī jūs redzēja aizbraucam. Un daudzi uzzynōja par tū un, kōjom īdami, saskrēja
tur nu vysom piļsātom, aizasteidzūt jim prīškā. Jezus, izkōpis krostā, īraudzeja
lelu ļaužu pulku. Un jys īsažālōja par tim, jo jī beja kai vuškas, kam nav
gona. Un jys sōce tūs daudz mōceit.
Tys ir Kunga vōrds.