PYRMAIS LASEJUMS Jer 15, 10. 16–21
Pravīša izmysums un atsagrīzšona.
LASEJUMS NU PRAVĪŠA JEREMIJA GRŌMOTAS
Bādas maņ, muna mōte, ka tu mani dzemdēji,
kildu un nasaticeibas veiru vysai zemei. Es na nu vīna naasu aizajēmis, ni
kaidam kū aizdevis, tūmār vysi mani nūlōd. Cikreiz maņ atsaklōj tovi vōrdi, es
tūs apēžu, un tovs vōrds maņ kliva par īprīcynōjumu un par munas sirds līksmeibu,
jo pōr mani ir pīsaukts tovs vōrds, Kungs, debesspulku Dīvs. Es nasēdēju storp
smejūšim ļaudim, lai sevi uzjautrynōtu. Zam tovas rūkas es sēdēju vīnatnē, jo
tu mani pīpiļdeji ar īgnumu. Kōdēļ munom sōpem nav gola, un muna bryuce nav dzīdynojama,
un tū nav īspējams izōrstēt? Tu maņ klivi kai maldynojūšs strauts, kai nadrūši
yudini. Tōdēļ Kungs soka tū: «Jo tu atsagrīzsi, es tevi pajimšu nu jauna, un tu
stōvēsi muna vaiga prīškā. Un, jo tu nūškērsi vērteigū nu mozvērteigō, tu byusi
it kai muna mute. Jī grīzsīs pi tevis, un tev nasanōks grīztīs pi jim. Un tevi
es padareišu šai tautai par stypru vara myuri. Jī karōs pret tevi, bet naspēs
uzvarēt, jo es asu ar tevi, lai tevi atpesteitu un izglōbtu», soka Kungs. «Un
es tevi atbreivōšu nu ļaundaru rūkas un izglōbšu nu varmūkas rūkom.»
Tys ir Dīva vōrds.
PSALME 59 (58)
Refrens: Kungs
ir muns patvārums bādōs. (R. sal. 17d)
2 Muns
Dīvs, izglōb mani nu munim īnaidnīkim,
un pasorgoj mani nu tim, kas sasaceļ
pret mani.
3 Izglōb
mani nu tim, kas nūzīdzeibu dora,
un nu asinskōrim veirim atpestej mani.
Refrens
4 Jo,
lyuk, jī uzglyun munai dzeiveibai,
maņ uzbryuk varonī.
5 Bet
manī, Kungs, nav ni nūzīguma, ni grāka;
bez munas vaines jī saskrīn un uzbryuk.
Refrens
10 Es
raudzeišūs uz tevi, muns styprums,
jo tu, Dīvs, esi muns cītūksnis.
11 Muns
Dīvs, jō žāļsirdeiba izīt maņ pretim.
Dīvs dareis, ka es redzēšu munu īnaidnīku
nagūdu.
Refrens
17 Bet
es dzīdōšu par tovu spāku
un reitausmā līksmōšūs par tovu žāļsirdeibu,
jo tu esi klivis muns cītūksnis
un muns patvārums munu cīsšonu dīnā.
Refrens
PYRMSEVANGELIJA DZĪDŌJUMS Jņ 15, 15b
Alleluja.
Es jyusus saucu par draugim,
jo vysu, kū dzērdēju nu sova Tāva, es
jums pasludynōju.
Alleluja.
EVANGELIJS Mt 13, 44–46
Leidzeibas par apslāptū montu un pērli.
LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS
MATEJS
Tymā laikā Jezus saceja ļaudim:
«Dabasu vaļsteiba pīleidzynojama teirumā
apslāptai montai. Kaids cylvāks tū atroda un otkon apslēpe, un, byudams par tū
prīceigs, aizgōja un pōrdeve vysu, kas jam beja, un nūpērka šū teirumu. Vēļ
dabasu vaļsteiba ir pīleidzynojama tērgōtōjam, kas meklej lobas pērles. Un,
atradis vīnu dōrgu pērli, jys aizgōja un pōrdeve vysu, kas jam beja, un nūpērka
tū.»