PYRMAIS LASEJUMS Is 6, 1–8
Pravīša Isaja paaicynōšona.
LASEJUMS NU PRAVĪŠA ISAJA GRŌMOTAS
Tymā godā, kod nūmyra Izraeļa kēneņš
Osija, es redzēju Kungu sēžam uz augsta un dyžona trūņa, bet jō tārpa molas pīpiļdeja
svētneicu. Jam blokus stōvēja serafi: tim kotram beja seši spōrni: ar divim tys
aizsedze sovu seju, ar divim apsedze sovas kōjas, ar divim lidōja. Un tī sauce
vīns ūtram un saceja: «Svāts, svāts, svāts ir debespulku Kungs! Vysa zeme ir jō
gūdeibas pylna!» Un nu saucēja bolsa nūdrebēja durovu palūdas, un svētneica pīsapiļdeja
ar dyumim. Un es saceju: «Bāda maņ! Es asu nūlamts nōvei! Jo es asu veirs ar
aptraipeitōm lyupom un dzeivoju storp ļaudim, kuru lyupas ir aptraipeitas, bet
sovom acim asu redzējis Kēneņu, debespulku Kungu.» Tod pi manis atlidōja vīns
nu serafim, un jō rūkā beja kvālūša ūgle, kū jys ar knaiblem pajēme nu oltora.
Ar tū jys pīsaskōre munai mutei un saceja: «Lyuk, tei ir pīsaskōruse tovom
lyupom: tova vaina ir izdzāsta un tovs grāks ir atlaists.» Un es dzērdēju Kunga
bolsu runojam: «Kū es lai syutu? Un kas gon mums īs?» Es atbiļdēju: «Raug, es
asu, syuti mani.»
Tys ir Dīva vōrds.
PSALME 93 (92)
Refrens: Kungs
ir gūdeibas pylns vaļdnīks! (R. sal. 1a)
1 Kungs
ir vaļdnīks! Jis ir īsatērpīs gūdeibā;
Kungs ir īsatērpīs un apjūzis sevi ar spāku.
Jis ir nūstyprynōjis zemi,
un tei natiks sakustynōta.
Refrens
2 Tovs
trūņs stōv styprs jau kūpš seņdīnom,
tu esi kūpš myužeigim laikim.
5 Tovas
līceibas ir ticeibas cīneigas
Kungs, tovam nomam, vysōs dīnōs pīsanōk
svātums.
Refrens
PYRMSEVANGELIJA DZĪDŌJUMS 1 Pīt 4, 14
Alleluja.
Svēteigi jyus asat, jo jyusus nīvoj
Kristus vōrda dēļ,
jo pōr jums nūsalaiž Dīva Gors.
Alleluja.
EVANGELIJS Mt 10, 24–33
Nasabeistit nu cylvākim.
LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS
MATEJS
Tymā laikā Jezus saceja apostolim:
«Mōceklis nav pōrōks par sovu skūlōtōju,
nedz kolps augstōks par sovu kungu. Pīteik, jo mōceklis tūp kai jō kungs. Jo
noma saiminīks teik saukts par Belcebulu, tod vēļ jo vairōk jō ļaudis. Nasabeistit
nu cylvākim, jo nikas nav nūslāpts, kas natyktu atklōts, un nikas nav slapans,
kas nakļyutu zynoms. Kū es jums soku tymsā, par tū jyus runojit gaismā, un kū
jyus dzēržat ausī, tū sludynojit nu jumtim. Un nasabeistit nu tim, kas nūkaun mīsu,
bet dvēseli naspēj nūnōvēt. Bet vairōk beistotēs nu tō, kas spēj dvēseli un mīsu
pazudynōt eļnē. Vai tod divus zvērbuļus napōrdūt par vīnu grasi? Bet nivīns nu
tim nakreit zemē bez jyusu Tāva grybas. Pat moti uz jyusu golvas ir vysi
saskaiteiti. Tōdēļ nasabeistit, jyus asat lobōki nakai daudzī zvērbuli. Kotru,
kas mani atzeist cylvāku prīškā, es atzeišu sova Tāva prīškā, kas ir dabasūs.
Bet, kas mani nūlīgs cylvāku prīškā, tū ari es nūlīgšu sova Tāva prīškā, kas ir
dabasūs»
Tys ir Kunga vōrds.