PYRMAIS LASEJUMS Lev 13, 1–2. 45–46
Spitaleiga cylvāka nūškēršona.
LASEJUMS NU LEVITU GRŌMOTAS
Ikvīnam, kū ir skōruse lepra un kū ir nūdalējis
prīstera sprīdums, byus saplāstas drēbes, plyka golva, mute pōrklōta ar drōnu
un sauks sevi par nateiru un aptraipeitu. Vysu tū laiku, cikom spitaleigais
byus slyms un naškeists, dzeivōs vīntuleibā ōrpus nūmetnes.
Tys ir Dīva vōrds.
PSALME 32 (31)
Refrens: Tu
esi muna prīca un muns patvārums. (R.
sal. 7)
1 Svēteigs
cylvāks, kuram pōrkōpums ir pīdūts,
un jō grāki ir pīdūti.
2 Laimeigs
tys, kuram Kungs nav īskaitejis vaini,
un kura dvēselē nav viļteibas.
Refrens
5 Es
atsazynu tev sovā grākā
un nanūslēpu sovu nūzīgumu.
Es saceju: «Atsazeišu Kungam sovā
nataisneibā»,
un tu atlaidi muna grāka vaini.
11 Prīcojitēs,
taisneigī, Kungā un līksmojit,
un gavilejit vysi, kam skaidra sirds.
Refrens
ŪTRAIS LASEJUMS 1 Kor 10, 31–11, 1
Kristus sekōtōjs Pōvuls.
LASEJUMS NU SVĀTŌ APOSTOLA PŌVULA PYRMŌS VĒSTULES KORINTĪŠIM
Brōli:
Vai jyus ādat, vai dzerat, vai cytu kū
dorat, vysu dorit Dīva gūdam! Naesit par īļaunōjumu ni jūdim, ni pogōnim, ni Dīva
Bazneicai, taipat kai es, kas vysim ceņšās byut pateikams vysā, namaklādams
lobumu sev, bet gon daudzim, lai jī tyktu pesteiti. Esit muni sekōtōji, taipat
kai es asu Kristus sekōtōjs.
Tys ir Dīva vōrds.
PYRMSEVANGELIJA DZĪDŌJUMS Lk 7, 16
Alleluja.
Lels valdnīks ir cēlīs myusu vydā,
un Dīvs ir apmeklējis sovu tautu.
Alleluja.
EVANGELIJS Mk 1, 40–45
Lepra nu jō acakōpe, un jys kliva teirs.
LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS MARKS
Tymā laikā:
Pi Jezus atnōce spitaleigais un, ceļūs nūsametis,
jū lyudze, saceidams: «Jo gribi, tu vari mani padareit teiru.» Jezus, īsažālōjis
par jū, izstīpe rūku, pīsaskōre jam un saceja: «Es grybu, tūpi teirs.» Un, kod
jys tū pasacēja, lepra nu jō nasakavejūt atsakōpe, un jys kliva teirs. Jezus
styngri jū nūbreidynōja un tyuleņ syuteja prūjom, saceidams: «Pīlyukoj, ka nivīnam
nikō nastōsteitu, bet ej un pasarōdi prīsteram, un par sovu škeisteišonu salic
upuri, kū Mozus ir pavēlējis, jim par līceibu.» Bet jys aizgōjis sōce stōsteit
un izplateit ziņu par nūtykušū, tai ka Jezus vairs navarēja atklōti īīt piļsātā.
Tōpēc jys uzturējōs ōrpus piļsāta nūmaļōs vītōs, un ļaudis nu vysom molom gōja
pi jō.
Tys ir Kunga vōrds.